►₪ ~ .. انجولا 2010 ! حسن شحاتة .. اللاعبون ! كاس العالم .. ~ ₪◄

" انجولا 2010 هي الاصعب .. و الافضل "

بالفعل انجولا 2010 هي الاصعب و لكن الافضل .. هتقولي ازاي هقولك في 2010 غاب عنا ست نجوم كبار تريكة و زكي و حمص و بركات و ميدو و شوقي و روحنا بفريق معظمه من الشباب و مع ذلك كسبنا .. هتقولي ازاي هقولك في 2010 كنا داخلين البطولة واحنا محطمين تماما بعد الخروج من تصفيات كاس العالم و مع ذلك كسبنا .. هتقولي ازاي هقولك في 2010 كنا داخلين و هدفنا الفوز باللقب للمرة التالتة علي التوالي و دي حاجة محدش عملها قبل كده فكانت مهمة مستحيلة بالنسبة لكثير من الناس و مع ذلك كسبنا .. هتقولي بس 2010 كانت اسهل مجموعة في الدور الاول هقولك ماشي متفق معاك في 2006 و 2008 كانت صعبة جبنا 7 نقاط مع اننا لعبنا الماتشات كلها بالاساسي انما في 2010 اللي كانت سهلة جبنا التسع نقاط كاملة مع اننا اخر ماتش ضد بنين لعبناه بالاساسي .. هترجع تقولي بردو ازاي كانت اصعب هقولك في 2006 و 2008 كانت في الادوار اللي بعد كده مباريات سهلة يعني في 2006 لاعبنا الكونجو في دور التمانية و السنغال في دور الاربعة و في 2008 لاعبنا انجولا في دور التمانية انما في 2010 كل الماتشات كانت قوية جدا لاعبنا الكاميرون بعدين الجزائر بعدين غانا .. هتقولي ماشي فهمنا انها كانت اصعب انما ازاي بقي كانت الافضل .. هقولك في 2006 كسبنا اربع ماتشات و اتعادلنا ماتش و النهائي كسبنا بضربات الجزاء و في 2008 كسبنا خمس ماتشات و اتعادلنا في ماتش انما في 2010 كسبنا الست ماتشات كلها .. هقولك في 2006 جبنا 12 جون بتواجد ميدو و متعب و زكي و تريكة و في 2008 جبنا 15 جون بتواجد متعب و زكي و تريكة و زيدان و في 2010 جبنا 15 جون بردو بس من غير ميدو و زكي و تريكة .. هتقولي مليش دعوة باللاعيبة في 2008 جبنا 15 و في 2010 جبنا 15 هقولك طب بص بقي للاجوان اللي دخلت فينا في 2008 دخل فينا 5 اجوان انما في 2010 دخل فينا جونين بس منهم جون جابوا احمد حسن في نفسه .. هقولك في 2006 و 2008 خدنا جوايز كتير بس في 2010 خدنا الجوائز كلها .. دلوقتي هقولك اقتنعت انها كانت الاصعب و الافضل هتقولي اقتنعت و مبرووك لمصر

" حسن شحاتة "

حسن شحاتة اكتر مدرب حقق انجازات للمنتخب المصري و مع ذلك بيتهاجم من الناس كلها .. كسب بطولة افريقيا تلات مرات متتالية و مع ذلك بيتهاجم من الناس كلها .. وصل بمصر للمركز العاشر في التصنيف العالمي و مع ذلك بيتهاجم من الناس كلها .. قدم عروض رائعة في كاس القارات و كسب ايطاليا بطلة العالم و مع ذلك بيتهاجم من الناس كلها .. و انا متاكد انه لو خسرنا من انجلترا الناس كلها هتنسي بطولة افريقيا اللي احنا كسبناها من كام يوم و كلوا هيهاجم حسن شحاتة .. هتقولي حسن شحاته مدرب محظوظ .. هقولك مش معقول كل البطولات دي حظ .. هقولك دا كسب بطولة افريقيا 2006 هتقولي كسبها عشان كانت علي ارضنا و بفضل الجمهور .. هقولك طب دا كسبها تاني في 2008 و المرة دي في غانا هتقولي اللاعيبة بتساعده .. هقولك طب و 2010 هتقولي بردو اللاعيبة بتساعده .. هقولك طب ما هو كسب بطولة افريقيا 2003 و كسب كاس مصر و السوبر المصري مع المقاولين هتقولي بردو محظوظ .. هقولك خلاص محظوظ محظوظ ما دام هو محظوظ و ماشية معاه و بيكسب كل البطولات دي ببركة دعاء الوالدين يبقي خليه يقود المنتخب انما انا عن نفسي شايف انه مدرب كويس جدا و انه محقق انجازات مع المنتخب الاول بس لأ دا حقق انجازات مع منتخب الشباب و مع المقاولين و صحيح في لاعيبة بتساعده بس هو اكتشف لنا لاعيبة كتير هتفيد المنتخب في المستقبل و لولا حسن شحاتة مكانتش اللاعيبة دي شمت فانيلة المنتخب و اكبر مثال جدو اللي كل الناس انتقدت حسن شحاتة عشان ضمه مكان ميدو و كله قال مين جدو دا و لكن جدو فاجئنا كلنا و كان كل ماتش ينزل اخر تلت ساعة يجيب جون و خد هداف البطولة و عنددك كمان المحمدي و احمد عيد و احمد فتحي و حسني و متعب و زكي و اوكا و عبد الشافي و غيرهم كتير كل دول بداوا يلعبوا تحت قيادة حسن شحاتة يعني معظم اللاعيبة حسن شحاتة اللي طلعهم مش هما اللي طلعوه و في النهاية اقول ان حسن شحاتة مدرب رائع و بطلوا بقي تنتقدوه

" اللاعبون "

لاعيبة منتخب مصر هم افضل لاعيبة في افريقيا و افضل من دروجبا و ايسيان و ايتو و كالو و توريه و كل الناس دي بس مشكلة لاعيبتنا انهم مبيحترفوش او اما بيحترفوا بيبوظوا كل حاجة انما مثلا لو تبص علي احمد حسن اما احترف و لعب في اندرلخت و التزم و ابدع الناس هناك كرموه و اعتبروه من اساطير الفريق و اترشح ليكون سفير ملف بلجيكا و هولندا لاستضافه كاس العالم و بردو زيدان ليه سمعة كويسة جدا في المانيا و هاني رمزي بردو و عمرو زكي في الدور الاول من الموسم اللي فات كانت كل الناس بتتكلم عليه و بتقول انه رايح ليفربول او ارسنال او تشيلسي و لكن هو اللي ضيع نفسه .. سيبونا بقي من الموضوع دا و ندخل في المهم ناس كتير اوي بتقول انه خلاص البطولة دي نهاية جيل رائع من اللاعبين لكن انا بختلف معاهم لانو في خمسة بس من قوام المنتخب الاساسي هما اللي كبار في السن تريكة و احمد حسن و وائل جمعة و الحضري و سيد معوض دول اللي فوق التلاتين و اللي ممكن يعتزلوا و عندك الحضري و احمد حسن ممكن يلعبوا سنتين كمان مرتاح و حتي لو الخمسة اعتزلوا فمنتخب مصر مش بتفرق معاه يعني احنا في 2008 غاب عننا تسع لاعيبة من اللي كانوا معانا في 2006 : احمد السيد و السقا و اينو و بركات و عبد الحليم علي و ميدو و سمير صبري و اسامة حسني و محمد عبد الوهاب الله يرحمه و في 2010 غاب عننا 12 لاعيب من اللي كانوا معانا في 2008 : ابراهيم سعيد و شادي محمد و شوقي و عمر جمال و طارق السيد و احمد شعبان و عبد المنصف و فضل و زكي و تريكة و حسن مصطفي و محمد صبحي يعني في كل بطولة نص القايمة بتتغير و احنا عندنا لاعيبة كتير اوي هيفضلوا يلعبوا لحد كاس العالم 2014 و بعد كده كمان زي حسني و متعب و فتحي و هاني سعيد و زكي و شوقي و المحمدي و زيدان و احمد عيد و فتح الله و غالي و ميدو و شيكابالا و جدو و اوكا و عبد الشافي و غيرهم و ان شاء الله المجموعة دي هي اللي هتوصلنا كاس العالم

" كاس العالم "

عايز اعرف فين المشكلة في كاس العالم .. احنا ابطال افريقيا سبع مرات و موصلناش غير مرتين .. ابطال افريقيا 3 مرات متتالية و مبنوصلش من سنة 90 .. سحقنا كوت دي فوار بالتلاتة في 2006 و بالاربعة في 2008 .. سحقنا الكاميرون بالاربعة في 2008 و بالتلاتة في 2010 .. سحقنا نيجيريا بالتلاتة في 2010 .. سحقنا الجزائر بالاربعة في 2010 .. كسبنا كل الفرق اللي وصلت كاس العالم بس بردو منوصلش .. قبل كده كانت مجموعات التصفيات بتتقسم من غيبر تصنيف في 2002 كان معانا السنغال و المغرب و الجزائر و في 2006 كان معانا الكاميرون و كوت دي فوار لكن في 2010 صنفوا الفرق و كنا في التصنيف الاول و لكن مع ذلك موصلناش .. قعدت افكر مع نفسي و بعدين لقيت ان السبب الوحيد ان دا مش مكتوب لنا .. و بعدين قعدت افكر تاني لقيت اننا كده احسن صحيح موصلناش كاس العالم بس خدنا بطولة افريقيا للمرة التالتة علي التوالي .. صحيح موصلناش كاس العالم بس كسبنا كل الفرق الافريقية اللي وصلت .. صحيح موصلناش كاس العالم بس بقينا العاشر علي العالم في تصنيف الفيفا .. صحيح موصلناش كاس العالم بس العالم كله بيشيد بينا و منبهر بانجازاتنا .. صحيح موصلناش كاس العالم بس المنتخبات الكبري زي انجلترا و اسبانيا طلبوا يلعبوا معانا .. بعد ما فكرت لقيت ان احنا اتعوضنا عن عدم الوصول لكاس العالم بحاجات كتير احسن من كاس العالم نفسه .. و بعدين ما ممكن لو كنا وصلنا كاس العالم كانت مثلا الطيارة وقعت باللاعيبة و هما راحين لا قدر الله او ممكن كانوا اتسمموا هناك او اتضربوا بالنار او حصلتلهم اي حاجة فالحمد لله علي كل شئ و الحمد لله اننا موصلناش لاننا خدنا حاجات تانية احسن بكتير من كاس العالم 2010 و ان شاء الله نوصل كاس العالم 2014

مع تحياتي